Axar.az
Yuxarı

Axar.Az Logo

Ən müqəddəs arzumuza qovuşduq...

Ana səhifə Kult
12 Punto 14 Punto 16 Punto 18 Punto

Hər ilimiz Dünya Azərbaycanlılarının Həmrəyliyi günü ilə başa çatır. İlin son günü – 31 dekabr bu böyük dünyanın harasında olmağımızdan asılı olmayaraq nəzərlərimizin Vətənə - doğma Azərbaycana yönəldiyi Milli Həmrəylik günüdür.

Həmrəylik – insanların əsrlər boyu arzuladığı, həyat haqqında düşüncələrində yaşatdığı və daim ona doğru can atdıqları elə bir ictimai şüur səviyyəsidir ki, ona nail olan xalqlar xoşbəxt və firavan yaşamaq arzularına qovuşurlar. Həmrəylik bütün uğurların açarıdır. Qələbəyə, xoşbəxtliyə, firavanlığa, səadətə və nəhayət, qlobal harmoniyaya açılan qapılar məhz insanlararası həmrəyliyə əsaslanır. Həmrəylik yalnız sağlam düşüncə, ədalətli məqsəd və saf niyyət əsasında doğulur. Saxta ideallar, qərəzli məqsədlər və bəd niyyətlər üzərində həmrəyliyə nail olmaq mümkün deyil. Bunu dərk etmək üçün haradan gəlib hara yetişdiyimizə baxmaq kifayətdir. 70 il bizə “həmrəylik” təlqin edən sovet ideologiyası yüz milyonlarla insanı “həmrəng” edə bildi, amma həmrəy edə bilmədi. Azadlığımızı qazandıq, müstəqilliyimizi bərpa etdik, amma həmrəyliyimizin olmaması səbəbindən torpaqlarımızı itirdik. Həmrəyliyimizi tapanadək nə azadlığımıza, nə də torpaqlarımıza sahib çıxa bildik. Nəhayət, şüurumuzun dərinliklərində yuva salmış “el bir olsa....” həqiqətini dərk etdik. El bir oldu – həmrəy olduq. Xalq birləşərək “Ya ölüm, ya Qarabağ” dedi. Dünyanın dörd bir tərəfində yaşayan soydaşlarımız “Vətən” dedi, hamı Azərbaycan amalı ətrafında səfərbər oldu. Xalqın həmrəyliyindən doğan vahid yenilməz güc bir “Dəmir Yumruq”da birləşib düşmənin başına endirildi. Azadlığımıza və müstəqilliyimizə qovuşduq. 1993-cü ildən başlayaraq taleyimizdə yaşanan dönüş də, bu günə qədər davam edən yüksəliş də və nəhayət, bizi xoşbəxt xalqa çevirən Vətən müharibəmizdəki Qələbəmiz də məhz Milli Həmrəyliyimizin sayəsində mümkün oldu. Bu Həmrəyliyi yaşatmaq, onu daha da gücləndirmək, şüurumuzda və əməllərimizdə gələcəyə daşımaq Azərbaycanın daimi müstəqilliyini və xalqımızın daimi xoşbəxliyini təmin etməyin zəmanətidir. Bu Həmrəylik gələcək qələbələrimizin zəminidir.

Həmrəylik - ümumxalq təəssübkeşliyidir. O bir mədəniyyətdir. Həmrəylik - dinləmək, başqalarına məxsus dünyagörüşünü və baxış bucağını bölüşmək, milli mənafeyimiz naminə ümumxalq yolunu seçmək, Vətən üçün düşünmək, el üçün çalışmaq mədəniyyətidir.

Həmrəylik elə bir idealdır ki, o ancaq az məsələlərdə mümkün olur. Amma bu “az”lar xalqın tarixi taleyində çox böyük rol oynayan “az”-lardır və hər bir soydaşımızın qəlbində və şüurunda özünə yer tapan bu “az”ların cəmindən böyük bir AZƏRBAYCAN sevgisi yaranır. Deməli, Həmrəylik həm də bir sevgidir. Millətə, xalqa, dövlətə, bayrağa və nəhayət, insanın insana və İnsanlığa olan sevgisidir Həmrəylik. Bu sevgi ilə də soydaşlarımız ilin son günündə ən xoş arzularla dolu nəzərlərini Ana Vətənə yönəldir və Azərbaycanımızla fəxr edirlər.

Tariximizə qızıl hərflərlə yazılan və gələcək nəsillərimiz tərəfindən böyük fəxarət və qürur hissi ilə xatırlanacaq bir il yaşadıq. Ən böyük xəyallarımız gerçəkliyə çevrildi, ən müqəddəs arzumuza qovuşduq – Vətənimiz azad oldu. Son 30 ildə ilk dəfə Yeni İlə doğma Qarabağımızla birlikdə addımlayırıq. Ən xoş arzuların və niyyətlərin bir-birinə qovuşduğu belə bir zamanda Azərbaycanımıza və dünyanın bütün Azərbaycanlılarına sevgi dolu Həmrəylik, yeni-yeni uğurlar və can sağlığı arzulayıram.

Tarix
2020.12.26 / 13:45
Müəllif
Cavanşir Feyziyev
Şərhlər
Digər xəbərlər

Qadınlar istismar edilir, kölə kimi satılır...

Millət vəkili incəsənət xadimləri ilə görüşdü

Azərbaycanın tanınmış memarı vəfat etdi

Vətən müharibəsi Qazaxıstan TV-nin ekranında - Video

Milli Məclisin hicablı deputatı, klassik xanım... - Foto

Mədəniyyət naziri Topqapı Saray Muzeyində - Foto

Afaq Bəşirqızı səhhətindən danışdı: Elgiz yalan deyib?

Qənirə Paşayeva tanınmış ziyalılarla görüşdü

Nazir İstanbulda azərbaycanlı incəsənət xadimləri ilə görüşdü

İlham Əliyevin bu sözləri normal anlaşılmır, yoxsa…

KULT
<>
Xəbər xətti
 
  
  
  
yatsan
Axar.az'da reklam Bağla
Reklam
Bize yazin Bağla