"Sonradan düşündüm ki, bu, ciddi səhvdir".

Bu sözləri şair Salam Sarvan BSU Yaradıcılıq fakültəsindəki işindən çıxması ilə bağlı Axar.az-a danışarkən deyib:

"Düzü, təbiətimdəki tənbəllik, hövsələsizlik mənə ara-sıra problemlər yaradır. Bəzən hansısa işdən tez yoruluram. Və bəzən də şəxsi ovqatıma, daxili gərginliyimə uyğun emosional qərarlar qəbul edirəm. Yaradıcılıq fakültəsindəki işimdən yorulub çıxmağımla bağlı Feysbukdakı statusum da belə qərarlardan biri idi. Amma sonradan düşündüm ki, bu, ciddi səhvdir. Tələbələrimizi və dostlarımızı təəssüfləndirən səhvdir. Ən əsası, mənə həmişə hörmətlə yanaşmış, fakültəni mənə etibar eləmiş dostlarımıza qarşı səhvdir. Yəni təkcə öz ovqatını düşünəcək qədər eqoist olmaq olmaz. Dostları məyus eləmək olmaz. Qalıb işləmək lazımdır. Nə isə, Allah mənə ağıl versin".

Xatırladaq ki, bir neçə gün əvvəl Salam Sarvan BSU Yaradıcılıq fakültəsindəki işindən getməsilə bağlı status yazmış və bu status əsasında bəzi saytlar xəbər vermişdi.