Türkiyədə yayımlanan "Akıncı" serialının 16-cı bölümündə Azərbaycan xəritəsi ilə bağlı yanlışlıq düzəldilib.

Kult.az Musavat.com-a istinadən xəbər verir ki, bu barədə NTC - Media açıqlama yayıb. Açıqlamada qeyd edilir:

"Akıncı" serialının 16-cı bölümündə dünya ölkələrinin sərhədlərini öz maraqları naminə yenidən müəyyənləşdirməyə cəhd göstərən "Xəritəçilər" (Haritacılar) adlı qanunsuz bir təşkilata üzv olan serialın mənfi obrazı tərəfindən Türkiyə və onun qonşu ölkələrini göstərən qondarma xəritə göstərilmişdir".

Media qurumundan verilən məlumatda əlavə olaraq bildirilir ki, tamamilə uydurma bir təşkilat olan "Xəritəçilər" tərəfindən kadrlara salınan o xəritə serialın bütün digər elementləri kimi bir xəyal məhsuludur:

"O epizodda olan xəritə və xəritədəki sərhədlər də həqiqəti əks etdirmir. Ssenariyə əsasən, bir qondarma təşkilatın niyyətini göstərmək üçün qurulsa da, dost və qardaş Azərbaycan xalqının həssaslığı nəzərə alınaraq bu xəritə dəyişdirilmişdir".

Xatırladaq ki, “Akıncı” serialının 16-cı bölümünün 41:27-ci saniyələrində kadrda xəritədə Azərbaycan ərazisi Ermənistan kimi təqdim edilmişdi. Bu yanlışlıq həm qardaş Türkiyədə, həm də ölkəmizdə sərt reaksiyalara səbəb olmuşdu.

“Akıncı” 2021-ci ilin yanvarın 1-dən Türkiyənin ATV telekanalında yayımlanır. Baş rollarda Şükrü Özyıldız, Büşra Dəvəli, Yıldıray Şahinlər və Tolqa Təkin yer alır. Hər bölüm 120 dəqiqə çəkir. Çəkilişlər İstanbulda həyata keçirilir.

“Akıncı”nın ilk 12 bölümünün rejissoru Vəli Çelik olub. Sonradan o, yaradıcı heyətdən ayrılıb. Onunla birlikdə ssenari müəllifi Hakan Kandal da gedib. Son bölümləri Ləvənt Türkan və Gökhan Ərkut çəkib. Hazırda serialın ssenari müəllifi Altuğ Küçükdür.