İllüziyaçı Elxan L Mefisto "Özünü tanıt" yarışmasındakı çıxışı ilə sosial şəbəkədə və mətbuatda müzakirə mövzusuna çevrilib.

Axar.az tez bir zamanda məşhurluq qazanan gənc sehrbaz Elxan L Mefisto ilə müsahibəni təqdim edir:

İllüziya bir insan həyatıdır...

– Elxan, neçə yaşınız var? Neçə ildir bu işlə məşğulsunuz?

– 23 yaşım var. Artıq 5 ildir ki, bu sənətlə professional olaraq məşğul oluram. Hobbimdir, ancaq professional məşğul olduğum hobbidir.

– Bu sənətdən gəlir götürə bilirsinizmi, yoxsa əlavə iş yeriniz var?

– Bəli, əlavə iş yerim var və ixtisasım üzrə işləyirəm. Bu işdən pul qazanmağın çox yolu var, ancaq Azərbaycanda hələ ki, bunun öz yolları inkişaf etməyib.

Sehrbaz olmaq üçün...

– Sehrbazlıqda uğur qazanmaq üçün fitri istedad lazımdır, yoxsa ağıl və cəldlik?

– İllüziya da bütün sahələrlə eynidir. Bütün sahələrdə uğur qazanmaq üçün o işlə həmin iş üçün yaranmış insan məşğul olmalıdır. İllüziya da belədir. Düzdür, başqası da məşğul ola bilər, ancaq süni alınar. Fikrimi bir sitatla izah edim. Eynşteynin bir sözü var: "Hər kəs dahidir, ancaq siz bir balığı uça bilmədiyi üçün mühakimə etsəniz, bütün ömrünü axmaq olduğunu düşünərək keçirəcək".

– Bu sahədə professional ola bilmək üçün hansı bacarıqlar şərtdir?

– Çox şey saymaq olar. Anlayış – insanları anlamaq. Bu, ilk öncə dostlar, ailə və yaxın ətrafa şamil olunur. Daha sonra hissiyyat. Burada söhbət olacaqları hiss etməkdən getmir, normal insan hissiyyatından gedir. Sehrbaz olmaq üçün ən hissiyyatlı və ən hissiyyatsız insanın hissini yaşamağı bacarmaq lazımdır. Yaradıcılıq – illüziya 2+2=4 deyil. Qanunauyğunluq yoxdur, daim inkişaf edir və yenilənir. Mütləq yaradıcı insan olmalısan. Cəldlik – illüziyanın bəzi qolları var ki, bu, çox əhəmiyyətli keyfiyyətdir. Cəldlik olmasa, olmaz. Məntiq, uzaqgörənlik. Çox şey qeyd etmək olar, ancaq mən daha çox bunları vacib bilirəm.

İllüziyanın sirlərini çözsəniz...

- İllüziya nədir? Burada həqiqətən fenomenal bacarığın rolu varmı?

- İllüziyanın sirlərini çözməyə çalışmayın. Əgər çözsəniz, reallığa çevriləcək. Siz sirləri bilsəniz belə, illüziya sehr olaraq qalır. Yaxşı şeylər düşünün, kimin harada, hansı şəraitdə düşüncələrinizi oxuyacağı bəlli olmaz. İllüziya, əslində, bir incəsənətdir. İzləyicilər nə xoşbəxt olur, nə narahat. Onların həzzi qeyri-adi hislərdən toplanır. Bütün hisslərin qarışığı ilə birgə qeyri-adi ani bir hiss keçirirlər və bu hisslərin çoxluğunu təəccüb hissi təşkil edir. İnsanlar əsasən sirləri axtarmırlar, onlara təəccüblənmək maraqlıdır. "Mənə yaxşı foks göstər" demək elə "məni yaxşı aldat" deməkdir. Əlbəttə ki, nəsə sirr ola bilər. Bunu tapmaqla insan öz həzzlərini azaldır. İllüziyasevərlər bunu etmirlər. Təəssüf ki, Azərbaycanda illüziya etikası kifayət qədər inkişaf etməyib. İnsanlar illüziyaya təəccüblənir və daha sonra aldandığını düşünüb narahat olurlar. Elə bilirlər ki, təhqir olunublar. Bu, heç də elə deyil. İnsanlar bundan həzz almalıdırlar. Təəccüblənən insan ağılsız, axmaq yerinə qoyulmuş insan deyil. Əksinə, həyatın dadını çıxaran insandır. Əgər sirləri çözərlərsə, sehrbazlıq onlar üçün maraqsız olar.

- Ən qəribə sehrbazlıq nümunələrindən biri də insanı iki yerə bölməkdir. Bu, necə baş verir?

- Bunun müxtəlif yolları var. Hər sehrbaz eyni şeyi müxtəlif cür edə bilər. Əmin olun ki, sirri bilmək insanların xoşbəxtliklərini azaldır. Sirri öyrənmək istəyi yeganə şeydir ki, çox istəyirik, ancaq öyrəndikdən sonra xəyal qırıqlığına uğrayırıq. Buna görə hər zaman bu istəkdən vaz keçmək lazımdır. Sirr önünüzdə olsa belə, ona baxmamaq daha yaxşıdır. Mən bunun sirrini sizə deyə bilmərəm. Sehrbazlar bütün sirləri bilirlər. Ən azından, bir çox sirləri. Ancaq sirlərdən danışmaq ən sevmədiyimiz mövzulardır. Çünki heç vaxt sirlərdən danışmırıq. Sirrin cavabı əlinizdə olsa da, sehrbazlar onu sizə deməz. Özünüz öyrənə bilərsiniz, ancaq bir sehrbazdan sirr eşidə bilməzsiniz. İnsanı iki yerə bölmək sehri klassik nömrədir. Çox qədimdir. Azərbaycanda da daim edənlər var. Mən bir dəfə etmişəm, ancaq böyük qutuların daşınması bunu daim etməyimə mane olub. Mənim sevdiyim sahə düşüncə oxumaq, öncədən bilmək, olacaqları təxmin etmək olduğundan bu işlərlə məşğul deyiləm. Bütün Azərbaycanın tanıdığı Tofiq Əmi var, yəqin ki, tanıyırsınız. O, tez-tez edir. Gözəl nömrədir, baxmayaraq ki, artıq çox adam bunu bilir.