20:27

"Maşa və Ayı" cizgi filminin istehsalçısı olan "Animakkord" şirkətinin direktoru Dmitri Loveyko Azərbaycan nağılı əsasında çəkilmiş “Balaca cırtdan” (Малыш Джыртдан) bölümünün cizgi serialının Yutub kanalından silinməsinə aydınlıq gətirib.

Axar.az xəbər verir ki, o, News.ru portalına açıqlamasında filmin Yutub səhifəsindən qaldırılmasının səbəbinin titrlərdə olan yanlışlığın düzəldilməsilə bağlı olduğunu bildirib.

D.Loveyko deyib ki, yanlışlıq düzəldiləndən sonra sözügedən seriya yenidən Yutuba yüklənəcək.

Loveyko, eyni zamanda, Azərbaycan nağılları əsasında daha iki seriyanın hazırlandığını da qeyd edib. Onun sözlərinə görə, iş tamamlandıqdan sonra hər iki bölüm Yutub kanalına yerləşdiriləcək.

Qeyd edək ki, "Maşa və Ayı" cizgi filminin Azərbaycan nağılı əsasında hazırlanmış son bölümü Yutub səhifələrindən silinmişdi. Yerli media “Cırtdan” nağılı əsasında hazırlanan, milli mətbəx nümunələri dolma, şəkərbura və paxlavanın nümayiş olunduğu, məşhur “Cücələrim” mahnısının səsləndiyi seriyanın erməni diasporunun təzyiqi ilə silindiyi haqda məlumat yaymışdı.