Vaqif Poeziya Günlərində iştirak edərkən Azərbaycanın Mədəniyyət Paytaxtı Şuşanın məscidlərini ziyarət etdik.

Kult.az xəbər verir ki, bu barədə Milli Məclisin Mədəniyyət Komitəsinin sədri Qənirə Paşayeva deyib.

O bildirib ki, qədim Çuxur məhəlləsindəki məscidin qalıqları Ermənistanın vandalizminin iç üzünü, ermənilərin dini dözümsüzlüyünü və multikultural dəyərlərdən çox uzaq olduğunu göstərən faktdır və məscidi bu cür görmək ürək ağrıdır:

“Şuşanın digər abidələri kimi məscidlər də keyfiyyətli və sürətli təmir-bərpa prosesinə cəlb olunumaqdadır. Mədəniyyət paytaxtımızın azadlıqdan abadlığa sürətli keçidi mənəviyyat, ibadət ocaqlarımızı da əhatə edir.

Yuxarı Gövhər Ağa məscidində Heydər Əliyev Fondunun apardığı təmir-bərpa işləri artıq yekunlaşmaq üzrədir.

Şuşada xidmət edən, quruculuqda çalışan insanlar artıq Gövhər Ağada ibadətlərini edir, dualar söyləyərək, dövlətimizə, xalqımıza uğurlar diləyirlər.

Bizlər erməni vandalizmini, erməni faşizminin iç üzünü görmək, duymaq istəməyənlərə gerçəklikləri yorulmadan çatdırmalıyıq. Çünki ermənilərin əsl məqsədi işğal etdikləri torpaqlarımızdan xalqımızın tarixini və mədəniyyətini də tamamilə silmək olub. Bu dəhşətli barbarlığı bütün dünyaya daha çox duyurmalıyıq”.