Çingiz müəllim XİN rəsmiləriylə daim əlaqə saxlayırdı.

Bu sözləri AYB-nin gənclərlə iş üzrə katibi Rəşad Məcid xalq yazıçısı Çingiz Abdullayevin "PEN-Klub Azərbaycan"ın prezidenti olmaması haqda mətbuatda yayılan xəbərlərlə bağlı Axar.az-a danışarkən deyib:

"Çingiz Abdullayevin "Pen-Klub"un rəhbəri kimi fəaliyyəti Fərid Hüseyn və Şəhriyar del Geraninin İranda həbsdə olduqları zaman daha qabarıq görünmüşdü. Şahidiyəm ki, həmin vaxtlarda Çingiz müəllim XİN rəsmiləriylə daim əlaqə saxlayır, tədbirlər keçirir və məsələni bütün səviyyələrdə qaldırırdı.

Buna görə də "Azərbaycanda Pen-Klub yoxdur" demək burada çalışan yazıçıların əməyinə kölgə salmaqdır".

Qeyd edək ki, PEN-Klubun Şöbələr və komitələr rəhbəri Pol Fineqan azərbaycanlı jurnalistin Çingiz Abdullayevlə bağlı göndərdiyi sorğuya cavab olaraq elə bir insanı tanımadığını bildirib. Bundan sonra mətbuatda Çingiz Abdullayevin PEN-Klubun prezidenti olmaması haqda xəbərlər yayılıb. Yazıçı özü xəbəri təkzib edib.