Noyabrın 4-də saat 19:00-da Akademik Milli Dram Teatrında xalq artisti Məmmədrza Şeyxzamanovun 100 illik yubileyinə həsr olunan xatirə gecəsi keçiriləcək.

Teatrın mətbuat xidmətindən Axar.az-a verilən məlumata görə, xatirə gecəsi Mədəniyyət və Turizm Nazirliyinin, Azərbaycan Teatr Xadimləri İttifaqının və Akademik Milli Dram Teatrının birgə təşkilatçılığı ilə keçiriləcək.

Xatirə gecəsində M. Şeyxzamanovun sənət dostları sənətkarın həyat və yaradıcılığından danışacaq, çəkildiyi filmlərdən fraqmentlər nümayiş olunacaq.

Tədbirdə sənətkarın ailəsinin 1937-ci ildə repressiya ilə üzləşməsindən bəhs olunan səhnə, xalq artistinin sənət yolunu özündə əks etdirən sərgi xatirə gecəsinin iştirakçılarının ixtiyarına veriləcək. Yubiley mərasiminin rejissoru xalq artisti Mərahim Fərzəlibəyovdur.

Qeyd edək ki, xalq artisti Məmmədrza Şeyxzamanov "Bəxtiyar" filmində Rəcəbov, "Qızmar günəş altında"da Alı kişi, "Leyli və Məcnun"da Dərviş, "Bir qalanın sirri"ndə həkim Eldostu, "Onu bağışlamaq olarmı"da polkovnik Qurbanov, "Qatır Məmməd"də Gəncə qubernatoru, "Nəsimi"də Şeyx Əzəm, "Əhməd haradadır" filmində Şirin kişi, "Tütək səsi" filmində İsfəndiyar kişi kimi rolları canlandırıb.