Axar.az Emma Ələkbərzadə ilə müsahibəni təqdim edir:

– Uzun müddətdir ki, musiqidən uzaq düşmüsünüz…

– Əslində, musiqidən uzaq düşməmişəm. Yenidən efirə çıxmağa başlamışam. Belə bir məqam var: əgər efirdə 2 həftədən çox görünmürsənsə, sənətdən uzaqlaşdığını düşünürlər.

– Əlbəttə, siz az-az görünməyinizə baxmayaraq, unudulmayan ifaçılardansınız…

– Elə dünya ulduzları var ki, məsələn, Şade 5 ildən bir efirə çıxır, amma Şade olaraq da qalır. Təbii, özünüz bilirsiniz ki, dünyaya daha bir balamı gətirdim. Hamiləlik dövrü təbii ki, mən efirdən uzaq idim.

– Övladınız doğulduqdan sonra fəaliyyətinizi bərpa etdiniz?

– Öncə təbii ki, özümü formaya salırdım. Amma bu yaxınlarda yenidən efirə çıxmağa başladım. İlk canlı ifam Bakı Caz klubunda oldu. Bundan başqa, ATV-nin "10lar" verilişindən gəldilər, çox möhtəşəm bir süjet çəkdilər. Məni hər zaman sevir, hörmətimi saxlayırlar.

Buna görə hər kəsə minnətdaram. Hamısı qarşılıqlıdır.

– Yaradıcılığınızda hansı yeniliklər gözlənilir?

– Yeni mahnılar. Konsert və klip söz vermirəm, amma yeni mahnılarım olacaq. Caz klubda mini çıxışlarım nəzərdə tutulub, amma mən onu konsert adlandırmaram.

– Niyə konsert haqda düşünmürsünüz?

– İndi ən böyük səhnəm ailəm, oğlum, həyat yoldaşım, bacım və qardaşımdır. Ən böyük konsertim Daviddir.

– Unudulmaqdan qorxmursunuz?

– Bəzi məşhur dostlarım deyir ki, Emma, sən efirdə az-az görünürsən, amma sənin yerini heç kim tuta bilmir. Yəqin ki, bu mənim peşəkarlığımdan irəli gəlir. Mənim soyadım Ələkbərzadədir – Ələkbərzadə unudulmur, nə babam, nə atam, nə bacım, nə də mən. Mən sənətə gələndən hər gün efirdə olmağı xoşlamamışam. Bu mənə əsla lazım deyil.