"Keçmiş davamedici zaman" layihəsində:

Axar.az-ın "Keçmiş davamedici zaman" layihəsinin budəfəki qonaqları xalq şairi Nəriman Həsənzadə və Rəşad Məciddir.

Layihənin növbəti sualı belə oldu:

"Musiqi bəstələnən şeirlərinizə görə qonorar almısınızmı? Bu qonorarın miqdarı nə qədər olub?"

Xalq şairi Nəriman Həsənzadə sovet dövründə bütün əsərlərinə görə qonorar aldığını deyir:

"Sovet dövründə yazdığımız bütün əsərlərə görə qonorar alırdıq, nəinki musiqi bəstələnən şeirlərimizə. Qonorarla ailə saxlayırdıq. Amma indi elə deyil.

Mənim sözlərimə bəstəkar Emin Sabitoğlu, Ramiz Mirişli, Ələkbər Tağıyev və başqa məşhur bəstəkarlar musiqi bəstələyib. Xalq artisti Zeynəb Xanlarova, Flora Kərimova, Xədicə Abbasova və başqa görkəmli ifaçılar şeirlərimə yazılmış mahnıları yüksək səviyyədə ifa ediblər. Aldığım qonorarların miqdarı tam olaraq yadımda deyil, amma bütün şeirlərimə görə də qonorar almışam".

Rəşad Məcid isə indi şairə şeirinə görə qonorar verilmədiyini deyir:

"Bir neçə şeirimə dostum Xanım İsmayılqızı mahnı bəstələyib. Cavan Zeynallı, Ayan , İranə, İlkin şeirimə bəstələnən mahnıları oxuyublar.

Bu il də Xumar Qədimova və Tünzalə Ağayeva sözlərimə bəstələdikləri mahnıları oxudular. Dediklərinə görə, davamı olacaq.

Milli Konservatoriyanın tələbəsi, gənc bəstəkar Aysel Kərim də bir şeirimə mahnı bəstələyib. Bu mahnı da yaxınlarda Gülüstan xanımın ifasında təqdim olunacaq.

Deyilənə görə, sovet dövründə sözlərə musiqi bəstələnəndə şairlərə də qonorar verilirdi. İndi isə belə bir şey yoxdur. Müğənnilər hesab edir ki, sözlərinə musiqi bəstələməklə, oxumaqla şairləri reklam edirlər və bu şairlərə kifayətdir. Mahnıda musiqinin orijinallığı ilə bərabər sözlərin də təsir gücü, əhəmiyyəti böyükdür. Təəssüf ki, bugünkü mahnıların çoxuna təsadüfi adamlar, qeyri-peşəkarlar söz yazırlar və belə primitiv, şablon, bayağı sözlər bəzən dəyərli musiqini də təsirsiz edir".