İcraatımda olan və bir ildən artıq davam edən məlum məhkəmə işinin apelyasiya mərhələsinə nöqtə qoyuldu.

Bu sözləri vəkil Vüqar Səfərli Təranə Qumralla müğənni Nazəninin arasında gedən məhkəmə prosesi haqda Axar.az-a danışarkən deyib. O, məhkəmənin uğurla başa çatdığını bildirib:

"Bakı Apelyasiya Məhkəməsi hüquqlarını müdafiə etdiyim İbrahimova Təranə Xeyrulla qızı və Musayev Musa İnqilab oğlu tərəfindən Xətai Rayon Məhkəməsinin 06.07.2015-ci il tarixli qətnaməsindən verilən apelyasiya şikayətini qismən təmin etdi.

Bakı Apelyasiya Məhkəməsi 14.01.2016-cı il tarixli qətnaməsi ilə 1-ci instansiya məhkəməsinin qəbul etdiyi qətnamənin təhqirə görə mənəvi ziyanın əvəzi kimi Salayeva Nazəninin xeyrinə İbrahimova Təranə Xeyrulla qızından 10000 (on min) manat tutulması hissəsini ləğv edərək, mənəvi ziyanın əvəzi kimi Təranə xanımdan Salayeva Nazəninin xeyrinə cəmi 500 (beş yüz) manat tutulmasını müəyyən etdi. Düşünürəm ki, Bakı Apelyasiya Məhkəməsinin qəbul etdiyi qətnaməni hüquqlarını müdafiə etdiyim İbrahimova Təranə Xeyrulla qızının və onun həyat yoldaşı Musayev Musa İnqilab oğlunun adına uğurlu hesab etmək olar.

Qeyd etmək istəyirəm ki, iş üzrə qarşı tərəfin verdiyi apelyasiya şikayəti məhkəmə tərəfindən tamamilə əsassız sayılaraq, rədd edildi".

Xatırladaq ki, bir müddət əvvəl müğənni Nazənin həmkarı Təranə Qumralı onu təhqir etməsi iddiası ilə məhkəməyə vermişdi.