İlhamə mənim sənətimə qiymət vermək üçün hələ çox inkişaf etməli, çox ucalmalıdır.

Bu sözləri xalq artisti Flora Kərimova həmkarı İlhamə Quliyevanın "Flora sənətkardır, onun "Tapar məni" mahnısını bəyənirəm" fikrinə münasibət bildirərkən deyib. Flora Kərimova İlhamə Quliyevanın mahnılarını bəyəndiyini etiraf etsə də, onu sənətkar hesab etmədiyini bildirib:

"Mən onun mahnılarını bəyənirəm. Əgər İlhamənin dözülməz xasiyyəti, hamı ilə dalaşmaq təkəbbürü, bu dünyanı alt-üst etmək istəyi olmasaydı, o, çox yaxşı müğənni ola bilərdi. İçindəki zəhər onu o qədər məhv edib ki, ifasında da bu acılıq hiss olunur. Sənətkar kimi İlhamə mənim yanımdan keçə də bilməz. İlhamə ilə mənim aramda okeanlar var. Gərək o okeanları fəth edə ki, mənim sənətimə yaxınlaşa bilə... Vəssalam!"

Flora Kərimova heç vaxt İlhamə Quliyeva ilə barışmayacağını da deyib:

"Mən İlhamə deyiləm ki, bu gün söyəm, sabah barışam".

Xatırladaq ki, İlhamə Quliyeva ötən gün ANS kanalının efirində xalq artisti Flora Kərimovanın sənətkarlığını yüksək qiymətləndirdiyini bildirib və onun "Tapar məni" mahnısını bəyəndiyini etiraf edib.