Bu gün ölkəmizdə də kifayət qədər məşhur olan, 43 illik ömrünə 18 albom çıxarıb, 200-ə yaxın mahnı bəstələməyi sığdıran kürd əsilli müğənni Əhməd Qayanın doğum günüdür. Fransanın paytaxtı Parisdə "sürgün" həyatı yaşadığı sırada vəfat edən müğənni yaşasaydı, bu gün 58-ci doğumunu qeyd edəcəkdi.

Axar.az xatırladır ki, illər öncə Türkiyədə millətçiliyin geniş vüsət aldığı vaxtlarda, 1999-cu il fevralın 12-də Şou-biznes Jurnalistlər Dərnəyinin mükafatlandırma mərasimində səhnəyə çıxıb "Kürdcə mahnı oxumaq, klip çəkdirmək istəyirəm", - deyən Əhməd Qaya kəskin reaksiya ilə qarşılamışdı:

"İndilərdə hazırladığım və qarşımızdakı günlərdə yayımlayacağım albomda kürdcə də bir mahnı oxuyacam və bu mahnıya klip çəkdirəcəyəm. Aramızda bu klipi yayımlayacaq ürəkli TV-lərin olduğunu bilirəm, yayınlamasalar, Türkiyə xalqı ilə necə hesablaşacaqlarını da bilirəm".

Mükafatını alandan sonra çıxış edən müğənni, kürdcə klip çəkdirəcəyini açıqlayanda aralarında məşhur müğənni Sərdar Ortacın da olduğu bir qrup tərəfindən sərt etirazla qarşılanmışdı. Əhməd Qayadan sonra səhnəyə çıxan Sərdar Sibel Canın "Padişah" mahnısının sözlərini dəyişdirərək "Atatürk yolunda bütün Türkiyə, bu vətən bizimdi, yadların deyil", şəklində oxumuşdu. Bu sırada salondakılar daha da coşaraq Əhməd Qayaya etirazlarını ona və yanındakılara çəngəl-bıçaq ataraq nümayiş etdirmişdilər.

Tədbirdə həyat yoldaşı ilə iştirak edən Əhməd Qaya bu olaydan sonra ölkədən getməyi üstün tutur və 2000-ci il noyabrın 16-da ürək çatışmazlığından Parisdə vəfat edir.

Zaman içində Türkiyədə türk-kürd məsələsi nisbətən normallaşdı, o vaxt Əhməd Qayaya "çəngəl-bıçaq" atanlar illər sonra kürdcə mahnı oxuyub, klip çəkdirməyə başladılar.

Sonda Əhməd Qayanın video-kameralar qarşısında hücuma məruz qaldığı gecənin sonunda verdiyi müsahibədə söylədiklərini təqdim edirik:

"İllərdir ki, bunu deyirəm: türk və kürd xalqları qardaşdır. Həmişə də belə qalacaqlar. Mən illərlə Türkiyənin parçalanmaz bütünlüyünü müdafiə etdiyimi söylədim, minlərlə il daha bölünməyəcəyini deyirəm, amma kürd xalqının varlığını qəbul etmək və müdafiə etmək məcburiyyətindədir bu ölkə. Mənim dediyim budur, bunu deyirəm yəni".