Gənc xanəndə Güllü Muradova "Leyli və Məcnun" operasında Leyli rolunda çıxış edəcək.

Axar.az xəbər verir ki, 2007-ci ildə keçirilən 2-ci Muğam Müsabiqəsinin qalibi olan Güllü ilk dəfə Opera və Balet Teatrının səhnəsinə Leyli kimi çıxacaq.

"Leyli və Məcnun" operasında Məcnun rolunda əməkdar artist, Opera və Balet Teatrının solisti Səbuhi İbayev olacaq.

Səhnəmizin ən gənc Leylisi - Güllü Muradova bu rolu oynayacağına görə çox xoşbəxt olduğunu bildirib:

"Çoxlarının arzusudur ki, opera səhnəsində bu möhtəşəm sənət əsərində Leyli olsun. Mənə nəsib oldu, çox şanslı və xoşbəxtəm. Həmişə sənət yoldaşlarımın təqdimatında "Leyli və Məcnun" operasını izləyirdim və Leyli və Məcnun obrazlarına heyranlıqla tamaşa edirdim.

Özüm o əsərin içinə daxil olandan sonra sanki yeni bir aləmə düşdüm və iki qəhrəmana yenidən aşiq oldum. Çox həyəcanlıyam, çalışacağam ki, ümidləri doğruldum".

Qeyd edək ki, tamaşa dekabrın 3-də, saat 19:00-da təqdim olunacaq.