"O Səs Türkiyə"də azərbaycanlı ifaçının məğlub olması sosial şəbəkədə geniş müzakirələrə səbəb olub.

ANS-in məlumatına görə, Murat Bozun komandasında olan azərbaycanlı iştirakçı Leyla Rəhimova növbəti mərhələyə keçmək üçün Gökhan-Hakan Özoğuzların komandasından olan Yusif Yüksəklə təkbətək qarşılaşıb.

Leyla Rəhimova Türkiyənin əfsanəsi hesab edilən mərhum Müslüm Gursəsin repertuarından "Vazkeçməm" mahnısını ifa edib. Yusif Yüksək isə Halil Sezainin "Üsyan" mahnısını ifa edib.

Münsiflər heyəti Leylanı bəyənsə də, zaldakı tamaşaçılar Yusif Yüksəki seçib. Beləliklə, həmyerlimiz müsabiqədə mübarizəsini dayandırıb.

Sosial şəbəkə istifadəçiləri Leyla və Yusifin arasındakı səsvermədə qərəzli mövqeyin olduğunu bildiriblər. Onlar "Yusif yaxşı oxudu, amma Leyla daha çox layiq idi, haqsızlıq edildi" yazıblar.

"O səs Türkiyə"nin münsif kürsüsündə Muradla yanaşı müğənnilər Əbru Gündeş, Hadisə, Hakan və Gökhan Özoğuz qardaşları əyləşib.

Bir neçə gün əvvəl Leyla Rəhimova Sinan Erkəklə birgə duet səsləndirib. Musiqiçilər Dəniz Sekinin repertuarından "Ədalətsiz seçim" mahnısını ifa ediblər.

Duetdən sonra münsif kürsüsündə əyləşən Murad Boz hər iki ifaçını tərifləyib. Lakin ulduz müğənni azərbaycanlı ifaçı Leyla Rəhimovanı seçib.