Bu gün görkəmli Azərbaycan bəstəkarı Qara Qarayevin doğum günüdür.

Axar.az xatırladır ki, Qara Qarayev 1918-ci il fevralın 5-də Bakı şəhərində doğulub. 1926-cı ildə Azərbaycan Dövlət Konservatoriyası yanında musiqi məktəbinə qəbul edilən Qara 1930-cu ildən Azərbaycan Dövlət Konservatoriyası yanında musiqi texnikumunda professor Georgi Şaroyevin fortepiano sinfinin tələbəsi olub.

1946-cı ildən Azərbaycan Dövlət Konservatoriyasında bəstəkarlıq sinfində müəllim kimi işə başlayan Qara Qarayev həmin il Cövdət Hacıyevlə birlikdə yazılmış "Vətən" operasına görə SSRİ Dövlət mükafatına layiq görülüb.

1961-ci ildə Cənubi Afrika yazıçısı Piter Abrahamsın eyniadlı əsəri əsasında yazdığı "İldırımlı yollarla" baletindən ikinci süitanın ifası ilə bağlı Los Ancelesdə I Beynəlxalq Çağdaş Musiqi Festivalının iştirakçısı olub, həmin il Qırmızı Əmək Bayrağı ordeni ilə mükafatlandırılıb.

Qara Qarayevi təkcə Azərbaycanda deyil, bütün postsovet məkanında, eləcə də Ermənistanda sevirdilər. Erməni bəstəkar Aram Xaçaturyan Qarayevi yüksək qiymətləndirirdi:

"Mən dostum Qara Qarayevin yaradıcılığında onun insan həyatının ən başlıca dəyəri haqqında insani, fəlsəfi və dərin deyim və söyləmlərini olduqca yüksək qiymətləndirirəm. Onun melodik dilinin özümlüyü və zənginliyi, xalq melosundan çox incəkliklə faydalanma bacarığı, harmoniyalarının yeniliyi və saflığı, parlaq və kəskin qarşılaşdırmaları, polifonik səs hörmə ustalığı, orkestr çalarları məni sevindirir. O, həyatı dərk etməyi, kəskin qarşıdurmalarda geri çəkilməməyi bacarır, doğruculluğa və insanlığa can atır. O, hər an qaynar həyatdadır, çağdaşdır, qəlbi insanlar üçün, onların xoşbəxtliyi üçün hər zaman açıqdır".

Dünya şöhrətli bəstəkar Dmitri Şostakoviç də Qara Qarayevin sənəti haqda yüksək fikirlər deyib:

"Qara Qarayev böyük qoçaqlıqla, hətta ötkəmliklə öz yaradıcılıq palitrasını hər cəhətdən genişləndirməyə çalışır. Belə çalışmanın mahiyyəti ənənəviliklə yaradıcılıq azadlığının çoxçalarlı, çoxsəviyyəli və üzvi şəkildə uzlaşdırılmasındadır. O, "xəlqilik" anlamı çərçivəsindən kənara çıxmaqdan qorxmur, daha doğrusu, bu anlamı genişləndirməyə çalışır.

Mən o dərəcədə özümə güvənən deyiləm ki, Qara Qarayev kimi böyük bəstəkardan söhbət açarkən "mənim şagirdim" ifadəsini işlədim. Lakin mən həmin görkəmli musiqiçinin, eləcə də Azərbaycan simfonizminin digər sayılan şəxsi Cövdət Hacıyevin Moskva konservatoriyasında, başçılıq etdiyim bəstəkarlıq sinfində çalışıb yetkinləşdiyi ilə hər bir zaman öyünəcəyəm".

Dahi bəstəkar Qara Qarayev 1982-ci il mayın 13-də Moskvada dünyasını dəyişib. Onu Bakıda dəfn ediblər.