Fransanın Baş naziri Sebastyan Lekornunun istefası Prezident Emmanuel Makronu küncə sıxışdırıb.

Axar.az xəbər verir ki, bu barədə Amerikanın “Nyu York Tayms” qəzeti məlumat yayıb.

“Lekornu son çarəsiz tapşırığı yerinə yetirə bilməsə (Makronun siyasi partiyalarla danışıqlar aparmaq əmrini nəzərdə tutur – red.), Makron küncə sıxılmış kimi görünəcək. O, parlamenti buraxa bilər ki, bu da çox güman ki, növbəti seçkidə ifrat sağçı Le Penə dəstəyi artıracaq. Fransa artıq siyasi deyil, konstitusiya böhranı içindədir. Onilliklər ərzində Beşinci Respublika ya parlamentdə prezidenti dəstəkləyən aydın səs çoxluğu ilə, ya da dövlət başçısına qarşı çıxan açıq səs çoxluğu ilə fəaliyyət göstərib. Bununla belə, bu gün parlament demək olar ki, bərabər üç fraksiyaya bölünüb: Le Penin sağçı millətçiləri, sol və ifrat solçular, onların ən görkəmli nümayəndəsi “İtaətsiz Fransa”nın lideri Jan-Lyuk Melenşon və Makrona sədaqəti tədricən azalan hökumətyönlü mərkəzçilər. Bütün bunlar ona gətirib çıxarıb ki, Fransada 21 ay ərzində artıq beş hökumət dəyişib və xaos hökm sürüb”, - məlumatda deyilib.