Çinin rəqib kimi ortaya çıxması ilə bir çox ölkənin, xüsusən də ABŞ-ın diqqəti Hind-Sakit okean bölgəsinə yönəlir.

Axar.az xəbər verir ki, bunu Türkiyənin müdafiə naziri Yaşar Gülər NATO çərçivəsində əməkdaşlığa həsr olunmuş Ankara forumunda deyib.

“Çinin potensial rəqib kimi ortaya çıxması ilə dünyanın, xüsusən də ABŞ-ın diqqəti əsasən Hindistan-Pakistan və Pakistan-Əfqanıstan xətləri boyunca münaqişə meyillərinin müşahidə olunduğu Hind-Sakit okean bölgəsinə yönəlib. Davam edən Rusiya-Ukrayna münaqişəsi də çoxşaxəli risklər yaradır. İsrailin Qəzzaya son hücumları, Yunanıstan və Suriyadan gələn təhdidlər regional təhlükəsizliyə təhdid kimi qəbul edilir”, - o bildirib.

Gülərin fikrincə, mövcud təhlükəsizlik vəziyyətinin toplanmış təcrübəyə əsaslanaraq təhlili NATO-nun niyə əvəzolunmaz oyunçu olaraq qaldığını daha yaxşı başa düşməyə kömək edir, eyni zamanda Türkiyənin bu ittifaqda artan əhəmiyyətini nümayiş etdirir:

“Terrorizm, hibrid və proksi müharibələr getdikcə daha çox yayılır. Enerji təhlükəsizliyi ilə bağlı münaqişələrin artan potensialı, ticarət müharibələrinin güclü təsiri və yeni rəqabət mühitinin yaranması potensialı, kosmik yarışlar qarşıdakı dövrdə mühüm təhlükəsizlik məsələlərinə çevriləcək”.