ABŞ Prezidenti Donald Tramp, İsrailin Baş naziri Benyamin Netanyahu və Rusiya Prezidenti Vladimir Putin kimi yırtıcılar dağıdıcılıq, repressiya və zorakılıq yolu ilə geniş miqyasda iqtisadi və siyasi dominantlıq axtarırlar.

Axar.az xəbər verir ki, bu sözləri “Amnesty International” təşkilatının baş katibi Anes Kallamar deyib.

Kallamar bildirib ki, dünya liderləri beynəlxalq hüququ pozur, Beynəlxalq Cinayət Məhkəməsinə hücum edir və Birləşmiş Millətlər Təşkilatının təsisatlarını tərk edir, sülh və təhlükəsizlik mexanizmlərini yeni bir qayda və ya özünəməxsus alternativlərlə əvəz edirlər:

“Diplomatiya deyil, müharibə hökm sürür: İsrailin Qəzzada fələstinlilərə qarşı soyqırımı sözdə atəşkəsə baxmayaraq davam edir; Rusiyanın Ukraynada insanlığa qarşı cinayətləri artmaqdadır; ABŞ ərazindən çox-çox uzaqda məhkəməsiz qətllər törədir, Venesuela və İrana qanunsuz hücumlar edir və Qrenlandiyanı ələ keçirməklə hədələyir. Konqo Demokratik Respublikası, Myanma və Sudandakı cinayətlər hələ də nəzarət altında deyil və Yaxın Şərq yenidən xaosa qərq olub”.

Kallamar həmçinin çox az ölkənin bu dünya liderlərinə qarşı çıxdığını vurğulayıb və siyasətçiləri, diplomatları, fəalları və digərlərini indiki çox çətin anda müqavimət göstərməyə çağırıb:

“Tarix - heç də bizə edilənlər demək deyil. Biz də onu yarada bilərik. Və bütün bəşəriyyət naminə insan hüquqları tarixinə daxil olmağın vaxtı gəldi”.