ABŞ məhkəməsi maliyyəçi Ceffri Epşteyn tərəfindən yazıldığı iddia edilən ölümdən əvvəlki məktubu dərc edib.

Axar.az Oxu.az-a istinadla xəbər verir ki, bu barədə “Nyu York Tayms" (NYT) nəşri məlumat verib.

Məktub Epşteynin kamera yoldaşı, dörd nəfərin qətlində ittiham olunan keçmiş polis əməkdaşı Nikolas Tartalyonenin sənədlərinin içində olub.

Onun sözlərinə görə, Epşteyn intihar cəhdindən sonra kamerasından çıxarıldıqda məktubu öz vəkillərinə verib.

Məktub aylarla davam edən nəticəsiz istintaqla bağlı şikayətlə başlayır. Daha sonra "vidalaşmaq üçün vaxt seçmək" imkanı ilə bağlı sözlər yazılıb. Mətn "Əyləncəli deyil - buna dəyməz" ifadəsi ilə bitir.

Məqalədə qeyd olunub ki, nəşr məhkəməyə məxfiliyin ləğvi üçün vəsatət təqdim edənə qədər qeyd uzun müddət dərc olunmayıb. Yalnız bundan sonra Nyu York ştatındakı Uayt-Pleyns federal dairə məhkəməsi məktubun dərc olunması ilə bağlı qərar verib.

NYT vurğulayır ki, məktubun həqiqiliyi barədə hələlik heç bir təsdiq yoxdur.