Müdafiə Nazirliyi döyüş bölmələrinin gücləndirilməsi və ukraynalı hərbçilərin həyatının qorunması məqsədilə əcnəbilərin hərbi xidmətə cəlb olunması bazarını açır. Məqsəd piyada qüvvələrinin 30–50 faizini əcnəbilərlə doldurmaqdır.

Axar.az xəbər verir ki, bu barədə Ukrayna müdafiə naziri Mixail Fedorov Teleqram kanalında məlumat verib.

Onun sözlərinə görə, əsas məsələ Müdafiə Qüvvələrində ən uzun müddət xidmət edən və döyüş tapşırıqlarında ən çox iştirak edən hərbçilərə qarşı ədalətin təmin olunmasıdır.

Nazir bildirib ki, belə şəxslər üçün ilin sonunadək mərhələli şəkildə hərbi xidmətdən tərxis prosesi başlayacaq:

“Bu, genişmiqyaslı transformasiyanın yalnız ilk mərhələsidir. İkinci mərhələ isə hərbi xidmətə qəbul və səfərbərlik prosesinin kompleks şəkildə yenilənməsidir. Biz aydın qaydaları olan və hərbçiyə hörmət göstərən ordu qururuq. İnsan həyatı ən böyük dəyərdir. Əsas vəzifəmiz cəbhə xəttində döyüşən hərbçilərin həyatını qorumaq üçün mümkün olan hər şeyi etməkdir. Məhz belə bir ordu Ukraynaya müharibənin başa çatdırılması üçün güclü mövqe qazandıra bilər”.