NATO-nun Müdafiə nazirləri ilk dəfə Rusiyanın Ukraynadakı hərəkətlərinin nəticələrini müzakirə edəcək.

Axar.az xəbər verir ki, Brüsseldə baş tutacaq görüşdə Rusiyaya cavab olaraq hansı addımların atılacağı barədə qərar qəbul ediləcək.

Fransa xəbər agentliyinə danışan NATO rəsmisi yığıncaqda Rusiya ilə əlaqədar alınacaq qərarların bu ilin sentyabr ayında İngiltərədə keçiriləcək zirvə görüşündə liderlərə təqdim ediləcəyini bildirib.

NATO həmçinin Rusiyadan Ukraynadakı separatçıları dəstəkləməyi və sərhəddə silah tədarükünü dayandırmasını tələb edəcək.

Qeyd edək ki, NATO-nun keçirəcəyi yığıncaqla bağlı danışan Rusiyanın qrumdakı daimi nümayəndəsi Aleksandr Qruşko NATO ilə əməkdaşlıq əlaqələrinin sonlandırıla biləcəyini bildirib.

Qruşko əlavə edib ki, NATO bölgəyə əsgər göndərmək barədə qərar verərsə, "soyuq müharibə" yenidən başlayacaq və bölgədə silahlanma güclənəcək.