1998-ci ildə Pakistanda nüvə silahı proqramını başlayan professor Əbdülqədir Xan bu ölkə ilə Türkiyə arasında nüvə silahı istehsalı ilə bağlı hər hansı bir əməkdaşlığın olmadığını bildirərək belə iddiaları "axmaq və sərsəm" adlandırıb.

Axar.az xəbər verir ki, alim yayılan məlumatların həqiqətdən uzaq olduğunu qeyd edib.

Pakistan Müdafiə Nazirliyinin keçmiş müşaviri general-leytenant Asif Yasin Malik də yayılan xəbərləri təkzib edib. Onun sözlərinə görə, iki ölkə arasında silah mübadiləsi ən yüksək səviyyədə olsa da, nüvə silahı ilə bağlı heç bir razılaşma olmayıb:

"Ötən iki il ərzində Pakistan və Türkiyə arasında müdafiə sahəsindəki əməkdaşlıq son dərəcə inkişaf edib. Bu xəbər doğru deyil. Pakistan nüvə texnologiyasının yayılmasına qarşıdır. Biz məcburiyyət qarşısında qaldığımız üçün nüvə silahını yaratdıq. Məncə, yayılan məlumatlar Türkiyəyə qarşı yox, Pakistana qarşıdır. Məqsəd müsəlman dünyasında yeganə nüvə silahına sahib olan Pakistana təzyiq etməkdir. Bizim nüvə sənayemiz ölkəmizi xarici müdaxiləyə qarşı qorumaq üçündür".

Xatırladaq ki, bir müddət öncə Almaniyanın "Die Welt" dərgisi Türkiyənin nüvə silahı əldə etmək istədiyini iddia edərək, bu məqsədlə lazımi texnikanı Pakistandan aldığını irəli sürmüşdü.