"Rusiyanın Kvemo Kartlidə yaratmaq istədiyi qeyri-stabilliyə Gürcüstan patriotları icazə verməyəcəklər".

Axar.az "Szona.org"a istinadən xəbər verir ki, bu açıqlama ilə Gürcüstanın eks-deputatı Ramin Bayramov çıxış edib. O, azərbaycanlıların heç vaxt Tiflisə qarşı çıxmayacaqlarını bildirib:

"Kvemo Kartli bölgəsinin əhalisinin böyük əksəriyyətini azərbaycanlılar təşkil edir. Kim nə deyir desin, buradakı azərbaycanlıların əksəriyyəti Saakaşvilinin tərəfdarlarıdır. Buna səbəb isə Saakaşvili dövründə azərbaycanlıların qarşılarında duran çox problemdən azad olmaları idi. Hazırda azərbaycanlıların əksəriyyətinin narazı olduğu məqam ondan ibarətdir ki, Saakaşvili dövründə qurulan şeylər məhv edilməyə başlayır. Hökumət bunu bilir. Onlar bilirlər ki, axır-əvvəl ölkədə etiraz aksiyaları başlayacaq. Ona görə də onlar bu aksiyaların qarşısını alacaqlar. Hətta bunun üçün gücdən də istifadə edəcəklər. Bu isə indiki dövrdə Gürcüstan hakimiyyəti ilə yanaşı Kremlə də sərf edir. Çünki Kreml çoxdan Kvemo Kartli bölgəsində etnik konflikt və separatizm ocaqları yaratmaq niyyətindədir. Tam məsuliyyətlə deyirəm ki, azərbaycanlılar Tiflisə və dövlətə qarşı hərəkət etməyəcəklər. Rusiyanın Kvemo Kartlidə yaratmaq istədiyi qeyri-stabilliyə Gürcüstan patriotları icazə verməyəcəklər".