İngiltərənin nüfuzlu "Qardian" dərgisi Suriyada yaşanan böhranın Prezident Rəcəb Tayyib Ərdoğana yeni bir problem açdığını, bunun nəticəsində Türkiyədə iqtisadi çətinliyin və xaosun başlandığını açıqlayıb.

Axar.az xəbər verir ki, "Türkiyə dostlarını itirir" başlıqlı yazıda Ərdoğan hökumətinin yeni vəzifəyə başlamasından cəmi iki ay sonra bu cür halın yaşandığı komik bir tərzdə izah edilib: "Əməd Davudoğlu bu müddətdə bal ayından daha çox kədər yaşadı. Kobaniyə müdaxiləni rədd edən Türkiyə son 1 həftədə 35 insanını itirdi. Bütün bunlar Türkiyə iqtisadiyyatına təsirsiz ötüşməyib. İqtisadi inkişafın bu ölkədə cari ildə 4 faizdən 3,3 faizə düşəcəyi ehtimal edilir".

Türkiyənin ard-arda Avropa Birliyinə (AB) daxil olmaq yolunda böyük səhvlərə imza atdığını qeyd edən dərgi Ərdoğanın "Yeni Türkiyə" planından əsər-əlamət qalmadığını ifadə edib: "Ərdoğan 80 milyonluq xalqı ilə özünü regional güc mərkəzi hesab edir. O, prezident seçkiləri öncəsi iddialı vədlər verib. Belə ki, Ərdoğana inansaq, 2023-cü ildə Cümhuriyyətin 100 illiyində bu ölkə dünyada iqtisadi gücünə görə 17-ci sıradan 10-cu sıraya qalxmalı, İstanbul isə qlobal maliyyə mərkəzi olmalıdır".