Türkiyənin baş naziri Rəcəb Tayyib Ərdoğanla birlikdə həbs həyatı yaşayan Adnan Atay maraqlı çıxış edib. O: "Baş nazir layihələrini bizə izah etdikdə, biz sadəcə gülürdük",- deyib.

O dövrdə Ərdoğanla birlikdə eyni həbsxanada cəza çəkən məhbus yoldaşı onunla bağlı xatirələrin hələ də canlı olduğunu bildirib. Hətta o, Ərdoğanın həbsxanada istifadə etdiyi çaydanın hələ də xatirə olaraq saxlandığını deyib.

Adnan Atayın sözlərinə görə, Ərdoğanın həbsxanada etdiyi söhbətlər ancaq qardaşlıqdan, ölkə məsələlərindən ibarət olub:

"O bizimlə çox səmimi idi. Bizə təkcə yoldaş olaraq deyil, həm də böyük qardaş kimi yanaşırdı. Onunla eyni kamerada olmasaq da, tez-tez görüşərdik. Tez-tez kamerama gələrək məni ziyarət edərdi".

Layihələrini bizə danışanda gülürdük

"Biz o vaxtlar onun danışdıqlarını gülərək dinləsək də, o, Baş nazir olacağına inanırdı. Onun qətiyyəti bizi təəccübləndirdi. 14 il öncə bizə danışdıqları hər bir layihəni reallaşdıra bildi".

Ərdoğanın həbsxana yoldaşı sonda deyib:

"O illər çox gənc idi, saçlarının ağardığını görüb kədərlənirik".

Qeyd edək ki, Rəcəb Tayyib Ərdoğan 1999-cu ildə 4 aylıq həbs cəzası çəkib.