Bundan sonra "Quql Transleyt"də (Google Translate) nitqin sinxron tərcüməsi də mümkün olacaq.

Axar.az xəbər verir ki, "Quql Transleyt" əlavəsinin "Android" mobil əməliyyat sisteminin idarəetməsi ilə işləyən qurğular üçün növbəti yenilənməsinə populyar dillərin real vaxt rejimində avtomatik tanınması və nitqin mətnli tərcüməsi funksiyası əlavə ediləcək.

"Quql" şirkətinin avtomatik tərcümə əlavəsi artıq səslə və ya smartfonun klaviaturasından daxil edilən çoxlu dillərlə işləyir. "Quql Transleyt" üçün yenilənmə isə şifahi nitqi avtomatik tanımağa imkan verir. Bu isə o deməkdir ki, istifadəçinin əl ilə dil seçməsinə ehtiyac qalmır.

Bundan başqa, "Quql" telefon kamerasını küçədə xarici dildə yazılan yol nişanına tərəf yönəldərək ekranda avtomatik tərcüməni almağa imkan verən funksiya üzərində iş aparır. Oxşar funksionallığa smartfonun kamerası vasitəsilə real vaxt rejimində mətnin tərcüməsini dəstəkləyən "Word Lens" əlavəsi malikdir.

Yenilənmənin nə vaxt tətbiqə buraxılacağı barədə məlumat verilmir.