Amerikalı media rəhbəri Rupert Murdok müsəlmanları alçaldan təhrikedici çıxışını "Foks Nyus" saytında dərc etdirib.

Axar.az Türkiyə mətbuatına istinadən xəbər verir ki, ABŞ-lı media rəhbəri islam peyğəmbərini təhqir edən jurnala edilən hücumu bəhanə gətirərək müsəlmanlara qarşı sərt sözlər işlədib.

Çıxışı dərc edən "Foks Nyus" saytı müsəlman dünyasını terror qaynağı olaraq xarakterizə edib. Mütamadi olaraq müsəlmanlara qarşı alçaldıcı yazılar dərc edən "Foks Nyus" saytının rəhbəri Murdok "Müsəlmanların bir çoxu sülhsevər ola bilər. Ancaq onlar içlərində böyüyən "xərçəng"in fərqinə varıb onu ortadan qaldırana qədər hamısı bu işdə məsuldur", – deyə yazıb.

Bundan əlavə dərc olunan yazıda Fransadakı müsəlman məhəllələri terrorçular üçün qaynağ olaraq göstərilib. Bu məhəllələrdə fransız mədəni qanunlarının işləmədiyi, İslam hüququnun hökm sürdüyü iddia edilib.

Sakinləri müsəlman olan bölgələri terror yuvası adlandıran Rupert Murdok polislərin bu məhəllələrə xüsusi əməliyyat dəstəsi olmadan girə bilmədiyini qeyd edib.

Daha sonra media rəhbəri müsəlmanların assimliyasiya edilməməsini Fransada yaranan problemlərin əsas səbəbi kimi göstərib.

Qeyd edək ki, "Foks Nyus" saytının müsəlmanları alçaldan nəşrlərinə dünyanın hər tərəfindən sərt reaksiyalar gəlməkdə davam edir.