İslamı təhqir etdiyi üçün 10 il müddətinə azadlıqdan məhrum edilən bloq yazarı Raif Bədəviyə vurulan şallaq yaraları yaxşılaşmadığı üçün məhkəmə təxirə salınıb.

Axar.az xəbər verir ki, Səudiyyə Ərəbistanından olan bloq yazarı Raif Bədəvinin şallaq cəzasının təxirə salınma xəbəri Beynəlxalq Əfv Təşkilatı tərəfindən yayımlanıb.

Londondan açıqlanan xəbərdə Bədəvinin dünən müayinə üçün qaldığı həbsxanadan xəstəxanaya aparıldığı bildirilib. Həbsxana həkimi Bədəvinin yanvarın 9-da 50 şallaqdan sonra yaranan yaralarının hələ də yaxşılaşmadığı, bədəninin yenidən şallaqlanmağa gücü çatmayacağı qeyd edilib. Həkim şallaq cəzasını gələn həftəyə saxlayıb.

Xatırladaq ki, bloqçu 20 həftə boyunca həftədə bir dəfə şallaqlanacaq. Bədəvi yanvarın 9-da Ciddənin Cəfali məscidində cümə namazından sonra 50 dəfə şallaqlanıb. Bu cəza beynəlxalq etirazlara səbəb olub.