"Təbii qazdan geosiyasi silah kimi istifadə edən Rusiya Prezidenti Vladimir Putinin Kiyev və ya Brüssel ilə olan əlaqələrdə problem yaranarkən dərhal bu silahdan istifadə edirdi".

Axar.az xəbər verir ki, bu sözlərlə Almaniyanın nüfuzlu "Fokus" (Focus) jurnalı çıxış edib.

Məqalədə son zamanlarda Putinin yalnız pis xəbərlər aldığı, sanksiyalar səbəbindən neft qiymətlərində kəskin ucuzlaşma müşahidə edildiyi qeyd olunub.

Ukrayna və AB ölkələrinin enerji bazarlarının alternativ axtarışlara çıxdığı qeyd olunan məqalədə 2014-cü ildə Rusiyadan AB-yə qaz ixracatının son 10 ilin ən aşağı səviyyəsinə endiyi, Qazpromun Avropaya yalnız 195 milyard kubmetr qaz nəql etdiyi açıqlanıb.

Dərginin iddialarına görə, artıq Rusiya Avropada qaz alıcıları tapmaqda çətinlik çəkir. Buna misal kimi də Cənub Axını layihəsinin ləğv edilməsi göstərilir.

Proqnozlara görə, artıq bir müddət sonra Avropanın Rusiyadan qaz asılılığı tamamilə aradan qalxacaq: "Ukrayna 2014-cü ildə Rusiyadan qaz idxalatını iki qat azaldıb. Əvəzinə AB-dən qaz idxalatını artırıb. Bunun nəticəsində daxili istehlakda Rusiya qazının nisbəti 2013-ci ildə 51,6 faiz olduğu halda, 2014-cü ildə bu rəqəm 34 faizə enib. Alternativ variantlarla AB-nin Rusiyadan asılılığı getdikcə azalmaqdadır".