Türkiyədə yaşayan holland jurnalist Geerdink yenidən həbs edilib və barəsində cinayət işi açılıb. Onu 1 və ya 5 il müddətinə azadlıqdan məhrum edilmə cəzası gözləyir.

Axar.az "Hürriyət" qəzetinə istinadən məlumat verir ki, Geerdinkin bundan əvvəl ötən ay ilk dəfə saxlanıldığı gün paytaxt Ankarada rəsmi səfərdə olan Hollandiya Xarici İşlər naziri Bert Koenders xəbərə "şok oldum" mesajıyla cavab vermişdi. Koendersin Xarici İşlər naziri Mövlud Çavuşoğlu ilə görüşündən dərhal sonra isə Geerdink azad edilmişdi.

Xatırladaq ki, 2006-cı ildən Türkiyədə çalışan və Diyarbəkirdə yaşayan hollandiyalı jurnalist Frederike Geerdink ötən ay "terror təşkilatının təbliğatını aparmaq" ittihamı ilə gözaltına alınmış, ifadəsi alındıqdan sonra sərbəst buraxılmışdı.