İtaliyanın Berqamo şəhərinin bələdiyyə sədri Georgio Qori İtaliyada koronavirusun sürətlə yayılmasına səbəb olan səhvləri açıqlayıb.

Axar.az xəbər verir ki, bələdiyyə sədri Lombardiya bölgəsinin bir sıra səbəblərə görə belə ağır böhrana məruz qaldığını deyib.

“Əsas səbəblərdən biri 10 milyon insanın yaşadığı bölgədə şəhərsalma, sənaye, nəqliyyat və hərəkət səviyyəsinin yüksək olmasıdır. Eyni zamanda, regionda yaşlı təbəqə də çoxluq təşkil edir.

Həmçinin, Berqamodakı xəstəxanaların birində aparılan analizə yanlışlıqla sətəlcəm diaqnozu qoyulması pandemiyanın yayılmasında "qığılcım" rolunu oynadı.

Onu da xatırladım ki, Milanda “San Siro” stadionunda keçirilən “Atalanta” – “Valensiya” oyununa Berqamodan 40 mindən artıq azarkeş getdi. Bir o qədər insan da qrup şəklində evlərdə, barlarda matçı izlədi. Çox ehtimal ki, həmin gecə virusun yayılması daha da sürətləndi.

Sonda onu qeyd edim ki, Berqamoda ilk yoluxma halı fevralın 23-də müəyyənləşib. Oyunun keçirildiyi 19 fevral tarixində isə virusun varlığından xəbərdar deyildik”, - deyə o bildirib.