Bu gün səhər saatlarında Qara dənizdə Rusiyaya məxsus hərbi birliklər döyüşə hazır vəziyyətə gətirilib.

Axar.az xəbər verir ki, Krasnodar və Temrukda hərbi vasitələr cəmləşdirilib. Rusiya Müdafiə Nazirliyindən verilən açıqlamada təlimlərin əsgərlərin təchizat, silahlardan istifadə və hərəkət qabiliyyətlərinin artırılması məqsədilə həyata keçirildiyi bildirilib.

Bildirək ki, Rusiya ilə ABŞ-ın liderlik etdiyi NATO ölkələri arasında hərbi təlim yarışı davam edir.

Türkiyənin də iştirak etdiyi NATO döyüş gəmilərinin Qara dənizdə təlimləri davam etdiyi bir vaxtda Vaşinqton da Ukrayna ilə birgə təlimlərə başlamağa hazırlaşır. Baltik ölkələrində də ordu ayağa qaldırılıb. Yaxın vaxtlarda Şərqi Avropada genişmiqyaslı təlimlər başlanacaq.

Rusiya da silaha əl atmaqda müttəfiqlərdən geri qalmır. Kreml rəhbəri Vladimir Putinin göstərişi ilə Şimal donanması 38 min əsgər ilə ayağa qaldırılıb. Təlimlərdə 41 döyüş gəmisi, 15 sualtı, 110 döyüş təyyarəsi və vertolyot, 3360 ağır artilleriya döyüş vəziyyətinə gətirilib.

Bundan əlavə, Sevastopol, Abxaziya, Cənubi Osetiya və Ermənistanda yerləşən Rusiya bazalarında da təlimlər davam edir.