"Türkiyədə son baş verənlər Ərdoğanı və onun partiyasını silkələmək məqsədi daşıyır".

Axar.az xəbər verir ki, bu açıqlama ilə analitik Vüqar Zifəroğlu çıxış edib. O, bütün bu olanların əslində bir həqiqəti ortaya qoyduğunu deyib:

"AKP-nin səslərinə birbaşa təsir edəcək ən mühüm faktor etnik kürdlərdir. Cənub-şərqi Anadoludan bir o qədər ciddi səs ala bilməyən ənənəvi müxalifətə rəğmən AKP seçkilərdə hər zaman həmin bölgənin əhalisinin dəstəyini əldə etməyi bacarıb. Lakin HDP faktoru hazırkı dönəmdə bu hədəfi təkrarlamağa maneə yaradır. Hazırda həmin partiya kifayət qədər aktiv iş aparır və 4-cü partiya olaraq parlamentə daxil olmağa çox yaxındır. HDP bölgədə səslərinə sahib çıxa bilsə, hətta AKP-nin təkbaşına iqtidar olmaq imkanını belə əlindən ala bilər. AKP-nin seçkilərdən tam qələbə ilə çıxmasında üç faktor var: kürd seçmənlərin səsi; iqtisadi amil – bu, onsuz da AKP-nin xeyrinədir; Türkiyə siyasi sistemində sağ mərkəzçi partiya boşluğunun olması".

Analitik sözügedən məsələ ilə bağlı bəzi mümkün ssenarilərə də aydınlıq gətirib:

"1. AKP təkbaşına iqtidar olaraq yola davam edir. Bunun üçün 47-48 faiz səs toplamalıdır.

2. HDP barajı keçərsə, AKP özü üçün bir koalisiya ortağı tapmağa məcburdur. Bu, MHP ola bilər.

3. Fətullahçı camaatın müəyyən mənada dövriyəyə girməsini istisna etmək olmaz. Ancaq AKP CHP ilə koalsiyaya girməz.

4. HDP-nin barajı keçəcəyi təqdirdə AKP ilə koalisiyaya girməsi mümkündür.

5. CHP ilə MHP koalisyasına gəldikdə isə hazırda səslərinin aşağı olması bunu mümkünsüz edir.

6. CHP-MHP-HDP koalisiyasıdır ki, bu da nəzəri cəhətdən ən mümkünsüz ssenaridir.

Qeyd edim ki, hələ qabaqda Türkiyədə siyasi proseslərdə maraqlı gedişlərin və oyunların şahidi olacağıq".