Gürcülərin 79%-i hesab edir ki, son bir ildə ölkədəki iqtisadi vəziyyət pisləşib.

Axar.az xəbər verir ki, bu nəticə Beynəlxalq Respublikaçılar İnstitutunun keçirdiyi sorğudan sonra ortaya çıxıb. Respondentlərin 63%-i ölkədə iqtisadi vəziyyətin məişət səviyyəsində pisləşdiyini bildirib. Gürcülərə görə, hazırda ölkə əhalisinin əsas problemi işsizlik (65%), qiymət artımı (37%) və yoxsulluqdur (26%).

Sorğuya əsasən, hazırda Gürcüstanda əhali üçün qəbul olunan şəxs Patriarx II İlya sayılır. Əhalinin 89%-i II İlyanı dəstəklədiyini bildirib. Ondan sonrakı yerlərdə keçmiş baş nazir Georgi Qaxariya (65%), Tiflis meri Kaxa Kaladze (54%), Avropa Gürcüstanı Partiyasının lideri David Bakradze (52%), Vahid Milli Hərəkat Partiyasının lideri Nika Meliya (42%), Bidzina İvanişvili (40%) və digərləri qərarlaşıb.

Respondentlərin 35%-i gələn həftə seçki olarsa Gürcü Arzusu Partiyasına səs verəcəyini bildiriblər. Ondan sonrakı pillələrdə Vahid Milli Hərəkat Partiyası (18%), Avropa Gürcüstanı Partiyası (3%), Aqmaşenebeli Strategiyası (3%) qərarlaşıb.