Səudiyyə Ərəbistanı Kralı Salman bin Əbdüləzizi əl Səud ilə Misir Prezidenti Əbdülfəttah əs-Sisi arasında telefon danışığı baş tutub.

Axar.az xəbər verir ki, kral Misirlə Birləşmiş Ərəb Qüvvələrinin yaradılmasını nəzərdə tutan "Qahirə Deklarasiyasını" yenidən müzakirə edib. Hər iki lider ölkələr arasında münasibətlərin inkişaf etdirilməsinin tərəfdarı olduğunu qeyd edib.

Digər tərəfdən Suriya rejiminin Rusiya vasitəsilə Səudiyyə Ərəbistanı ilə münasibətlər qurduğu iddia edilir.

Livandakı Əsəd tərəfdarı "Əl Əhbar" qəzetinin xəbərinə görə, Suriya Milli Təhlükəsizlik Bürosunun direktoru Əli Məmlük ötən həftə paytaxt Ər-Riyada gedərək bu ölkənin Müdafiə naziri Şahzadə Məhəmməd bin Salmanla görüşüb. Müzakirələrdə suriyalı nazirin hakim ailədən ölkəsi ilə bağlı siyasəti dəyişməsini xahiş etdiyi bildirilir.