Cənubi Koreya və ABŞ prezidentləri - Yun Suk Yol ilə Co Bayden Şimali Koreyanın nüvə-raket təhdidlərinə qarşı birgə hərbi təlimlərin sayının və miqyasının çoxaldılmasına dair müzakirələrə başlamağı qərar alıb.

Axar.az xəbər verir ki, bu barədə razılıq Baydenin cənubi koreyalı həmkarı ilə Seulda keçirilən ilk görüşündə əldə olunub.

Görüşdən sonra keçirilən mətbuat konfransında Prezident Yun Suk Yol bildirib ki, ABŞ Prezidenti ilə görüşdə müttəfiqlərin Şimali Koreyanın mümkün nüvə hücumuna qarşı hazırlıq üçün müxtəlif formalarda hərbi təlimlərin keçirilməsinə ehtiyacın olmasını geniş müzakirə ediblər.

Görüşün yekununa dair birgə bəyanatda qeyd olunub ki, ABŞ Cənubi Koreyanın müdafiəsi üçün ABŞ-ın nüvə silahından və raketdən müdafiə sistemi də daxil olmaqla, bütün müdafiə imkanlarından istifadə etməsi mövqeyinə sadiqdir.