Türkiyədə Ərzurum-İqdır avtomobil yolu üstündə yerləşən Tuzluca bölgəsinin giriş qapısında "Xoş gəldiniz", "Gülə-gülə" ifadələrinin ermənicə yazılmasına qarşı etiraz aksiyası keçirilir.

Report xəbər verir ki, aksiya iştirakçıları həmin tablonun yığışdırılması üçün imzatoplama kampaniyasına başlayıblar.

Türkiyə-Azərbaycan Dərnəkləri Dostluq Federasiyasının İqdırdakı "Azərbaycan evi" dərnəyinin sədri Sərdar Ünsal bildirib ki, bu bölgə İqdır əyalətinin mərkəzindən 39 km aralıda yerləşir: "Bölgənin giriş qapısına türk, ingilis, kürd və erməni dillərində "Xoş gəldiniz" və "Gülə-gülə" ifadələri yazılan lövhə asılıb. Biz həmin lövhənin yığışdırlıması üçün imzatoplama kampaniyası keçiririk. Ermənicə yazı bizi və Azərbaycandakı qardaşlarımızı narahat edir".

Qeyd edək ki, bu yazının təşkilatçısı və icraçısı Tuzluca bələdiyyəsidir. Bələdiyyə sədri kürd etnik qrupunun təmsilçisi Mehmet Gültəkin yazının silinməsini istəyənləri "irqçilikdə" ittiham edərək, ermənilərlə probleminin olmadığını vurğulayıb.