12:26

"Əhrar əl İraq" terrorçu qruplaşması Türkiyə Ordusunun İraqın Mosul şəhərindəki Başika hərbi bazasını artilleriya qurğuları ilə atəşə tutub.

Axar.az xəbər verir ki, bu haqda “ATARAKSİA” Teleqram kanalı məlumat yayıb.

Məlumatda qruplaşmanın məsuliyyəti öz üzərinə götürdüyü haqqında yazılı açıqlama verdiyi qeyd olunub.

Türkiyə Müdafiə Nazirliyi terror hücumu zamanı heç bir tələfatın olmadığını bildirib. Məsələ ilə bağlı mətbuata açıqlama verən Türkiyə milli müdafiə naziri Hulusi Akar ən son terrorçu zərərsizləşdirilənədək mübarizənin davam edəcəyini vurğulayıb:

“Suriyanın, İraqın şimalında fasiləsiz və artan şiddətlə, artan sürətlə, terror və terrorçunu qaynağında yox etmək məqsədilə fəaliyyətlərimizi davam etdiririk. Mehmetcik şiddətli soyuğun və qarın olmasına rəğmən daha da artan əzmkarlıqla və böyük bir qəhrəmanlıqla mübarizəni davam etdirir. Zaman-zaman təxribatlar, hücumlar olur. Bunlara qarşı da anında misli ilə lazımi cavab verilir. Bundan heç kimin şübhəsi olmasın. Ən son terrorçu məhv edilənədək bu mübarizə davam edəcək”.

Qeyd edək ki, terrorçu qruplaşmanın İran tərəfindən dəstəkləndiyi bildirilir.