2015-ci ildəki teraktların böyük əksəriyyəti "Kalaşnikov" avtomatı ilə həyata keçirilib.

Axar.az xəbər verir ki, "Qardian" qəzeti Avropa polislərinin bu silahları radikal islamçılara kimin satdığını müəyyən etməyə çalışdığını bildirib:

"Hazırda dünyada təxminən 200 cür "Kalaşnikov" tipli silah istehsal edilir. Bunun əsas istehsalçısı Çindir. Çinlə bərabər, dünyanın 30 ölkəsi "Kalaşnikov"un qanunu istehsalçısıdır. Çin bu avtomatları əsasən Afrika ölkələrinə ixrac edir. Bundan sonra isə həmin ölkələrdəki əsgərlər onları ucuz qiymətlə qara bazarda satırlar. Liviya da artıq əsas ixracatçılar siyahısındadır. BMT-nin sonuncu hesabatına əsasən, Liviya 14 ölkəyə qanunsuz olaraq avtomat ixrac edib. "Kalaşnikov" avtomatının böyük hissəsinin 35 il əvvəl Balkan, keçmiş SSRİ və Şimali Afrika ölkələrində istehsal olunmasına baxmayaraq, hələ də istifadəyə yararlı on milyonlarla avtomat var. Məhz bunu əldə etmək imkanlarının asan olması "Kalaşnikov"u Avropadakı terrorçuların əsas silahına çevirib".