PKK rəhbərləri rus və çeçen əsilli qruplaşmalarla əməkdaşlıq etmək niyyətindədir.

Axar.az xəbər verir ki, bu sözləri Türkiyənin Siyasi, İqtisadi və İctimai Araşdırmalar Mərkəzinin (SETA) İstanbul üzrə koordinatoru Fəxrəddin Altun deyib.

O, PKK-nın sensasion təxribatları həyata keçirmək üçün elə də güclü imkanlara sahib olmadığını bildirib:

"PKK beynəlxalq arenada özünə tərəfdaş axtarışlarına çıxıb. Bu terror təşkilatı ittifaq strategiyası yaratmaq istəyir. Kürd Toplumları Birliyi (KTB) cəmiyyətə psixoloji təsir etmək üçün dəfələrlə çağırışlar etdilər. Bu çağırışlarla onlar əslində cəmiyyəti çaşdırmaq, əsl hədəfdən yayındırmaq istədilər. Lakin bunun nəticəsiz qaldığının hamımız şahidi olduq".

Altun onu da əlavə edib ki, PKK yalnız DHKP-C və MLKP kimi terror təşkilatları ilə əməkdaşlıq etmir:

"PKK beynəlxalq arenalarda terror aktı həyata keçirə bilən qruplaşmalarla da əməkdaşlıq etməyə çalışır. Burada ideoloji yaxınlıq rol oynamır. Əsas məqsəd hədəflərin üs-üstə düşməsidir. PKK asanlıqla rus və iranlılarla əməkdaşlıq edə bilər. Hazırda rus və çeçen əsilli terror qruplaşmaları ilə əməkdaşlıq etmək niyyətləri var. PKK bununla sensasion təxribatlar həyata keçirmək istəyir. Lakin heç bir qruplaşmalarla əməkdaşlıq edə bilməyəcək. Çünki PKK-nın çağırışlarına əhəmiyyət vermirlər. PKK Türkiyənin cənub-şərqində ancaq əsgərlərə qəfil hücum etməyi bacarır. Bundan artığını da etməyə gücü çatmır".