Martın 23-də Ər-Riyadda Ukrayna, Rusiya və ABŞ arasında baş tutacaq danışıqların mövzusu Qara dənizdə atəşkəs və taxıl tədarükü olacaq.

Axar.az xəbər verir ki, bu barədə "Vaşinqton Post" məlumat yayıb.

Qeyd olunub ki, Ukrayna və Rusiya heyətinin Səudiyyə Ərəbistanındakı nümayəndələri üzbəüz görüşməyəcək:

"Bu, Ağ Evin tərəflərin indi sülhə həmişəkindən daha yaxın olduğuna dair təminatlarına baxmayaraq, döyüşən tərəfləri ayıran uçurumu göstərir. Danışıq aparan şəxslər ayrı-ayrı otaqlarda olacaq və mesajları vasitəçilər ötürəcək".

Bildirilib ki, Ər-Riyaddakı Rusiya nümayəndə heyətinə Federasiya Şurasının Beynəlxalq məsələlər komitəsinin sədri Qriqori Karasin və Federal Təhlükəsizlik Xidməti direktorunun yüksək vəzifəli müşaviri Sergey Beseda başçılıq edəcək:

"Ukraynanı müdafiə naziri Rüstəm Umerov və Prezident Ofisi rəhbərinin müavini Pavel Palisa təmsil edəcək.

Amerika tərəfini Dövlət katibi Marko Rubionun siyasətin planlaşdırılması üzrə müavini Maykl Anton, həmçinin Kelloqun köməkçiləri və milli təhlükəsizlik müşaviri Mayk Uoltsun ofisinin nümayəndələri təmsil edəcəklər".