Yanvarın 30-da Ermənistanın tüksək texnologiyalar sənayesi naziri Mxitar Ayrapetyan Hindistanın “Micron İnstruments” şirkətinin direktoru və sahibi Vikram Sanqali və GTB holdinqinin prezidenti Qriqor Ter-Qazaryanın başçılıq etdiyi nümayəndə heyətini qəbul edib. Görüşdə Ermənistanda yeni sənaye istehsalının yaradılması üçün investisiya imkanları müzakirə olunub.

Axar.az xəbər verir ki, “Hraparak” görüşdə silah istehsalının yaradılmasının müzakirə edildiyini bildirib.

Nəşr yazıb ki, “Micron İnstruments” NATO ölkələri üçün iriçaplı artilleriya istehsal edir və Ermənistandakı yeni zavod ABŞ-ın himayəsi altında fəaliyyət göstərəcək:

“Bundan başqa, Qriqor Ter-Qazaryanın ABŞ səfiri ilə görüşü də məlum olub. Səfir Araratdakı “GTB Steel” zavodunda - erməni-amerikan investisiyaları əsasında yaradılmış metallurgiya zavodunda olub. Bu şirkət qabaqcıl texnologiyalardan və innovativ proseslərdən istifadə edir ki, bu da ABŞ-ın innovasiya və texnologiya sahəsində aparıcı rolunu təsdiqləyir. Mənbələrimizin məlumatına görə, dünən Qriqor Ter-Qazaryan Ermənistan Müdafiə Nazirliyinə də baş çəkib - şahidlər onun kortejini departamentin binası yaxınlığında görüblər.

Beləliklə, aydın olur ki, Ermənistan hakimiyyəti Ter-Qazaryanın şirkətinə NATO standartlarına cavab verən silahların istehsalını həvalə edib”.

Nəşr vurğulayıb ki, istehsal edilən silahların Avropa ölkələrinə tədarükü planlaşdırılır.

Qeyd edilir ki, bu addım Rusiya ilə münasibətlərdə ciddi narahatlıq yaradır.