İnsanlıq İkinci Dünya müharibəsinin başa çatmasının 80 illiyini qeyd etdiyi bir vaxtda hər gün sübut olunur ki, səkkiz onillik əvvəl qurulmuş beynəlxalq nizam bu gün sürətlə dağılır. Qarşıda bizi uzun və təhlükəli qlobal nizamsızlıq dövrü gözləyir.

Axar.az xəbər verir ki, bu barədə britaniyalı tarixçi, Mərkəzi və Şərqi Avropanın müasir tarixi və siyasəti üzrə ekspert Timoti Qarton-Eşin “Faynənşl Tayms” qəzetində dərc edilən məqaləsində bildirilib.

O qeyd edib ki, insanlığın heç vaxt qızıl dövrü olmayıb, lakin 1945-ci ildən sonra Avropanın, Asiyanın və Okeaniyanın əhəmiyyətli hissəsi ABŞ-ın himayəsi altında təhlükəsizlik və firavanlıq içində yaşayıb:

"İndi bu nizam tənəzzülə uğrayır: bu, qismən qloballaşma nəticəsində digər ölkələrin yüksəlişi, qismən isə Amerikanın lovğa və özünəqənim siyasəti səbəbindəndir. Prezident Donald Tramp bu quruluşun qalan hissəsini misilsiz sürət və məsuliyyətsizliklə dağıdır".

Tarixçi köhnə nizamın dağılmasının əlamətləri kimi hazırda davam edən üç böyük müharibəni (Ukraynada, Qəzzada və Sudanda), nüvə dövlətləri Hindistan və Pakistan arasında potensial müharibə riskini, habelə Trampın ticarət tariflərini göstərir ki, bunlar da yalnız xaosu daha da artırır.