Norveçin şimal rayonlarının intensiv hərbiləşdirilməsi və “NATO-laşması” onların təhlükəsizliyinin möhkəmlənməsinə deyil, Arktikada hərbi-siyasi gərginlik və eskalasiya risklərinin səviyyəsinin artmasına gətirib çıxaracaq.

Axar.az xəbər verir ki, bunu Rusiyanın Norveçdəki səfirliyi xarici işlər naziri Espen Eydenin Şimali Atlantika Alyansının Arktikada rolunun ehtimal olunan güclənməsi ilə bağlı sözlərini şərh edərkən bildirib.

"NATO qüvvələrinin Norveçin Şimalına və Arktika bölgəsinə getdikcə daha açıq şəkildə yerləşdirilməsi Oslodan guya regional sabitliyin qorunmasında, anlaşılmazlıqların və qəsdən eskalasiyanın qarşısını almaqda maraqlı olduğuna dair boş təminatların müşayiəti ilə baş verir. Eyni zamanda, Rusiya ilə Şimali Atlantika Alyansı arasında effektiv etimad yaradılması tədbirləri və ya hərbi kommunikasiya kanalları yoxdur ki, bu da təhlükəli insidentlərin baş vermə ehtimalını xeyli artırır", - bəyanatda bildirilib.