İran artıq İsrailə raket hücumunun beşinci dalğasına başlayıb.

Axar.az xəbər verir ki, bu barədə "İsrail" radiosu məlumat yayıb.

Radio həmçinin beşinci dalğanın bütün İsraili hədəf aldığını bildirib. İsrailin şimalında, mərkəzində və cənubunda partlayış səsləri eşidilib. Raketlərdən bəziləri Böyük Təl-Əviv bölgəsinə düşüb.

“Kanal 12” Təl-Əvivin cənubundakı Rişon Le Zion bölgəsinə raket düşdüyü ilə bağlı məlumat paylaşıb.

İsrail ordusunun mətbuat xidməti də son bir neçə saat ərzində İrandan İsrailə doğru onlarla raket atıldığını və onlardan bir neçəsini zərərsizləşdirmək mümkün olduğunu açıqlayıb.

Xilasetmə qrupları raketlərin düşdüyü barədə məlumatların daxil olduğu bir neçə yerdə axtarış-xilasetmə işləri görür.

“Yedioth Ahronoth” qəzeti İranın son hücumunda bir neçə israillinin yaralandığı və 6 binaya ciddi ziyan dəydiyi barədə məlumat yayıb.