FSB Rusiyaya 7 milyard dollarlıq ziyan vuran polkovniki öldürdü. Qatillərdən biri 34 yaşlı azərbaycanlı qadındır?

Ukrayna Təhlükəsizlik Xidmətinin polkovniki İvan Voroniç Kiyevdə Rusiya Federal Təhlükəsizlik Xidmətinin (FSB) 2 əməkdaşı tərəfindən öldürülüb. Qətl səsboğucu tapançadan istifadə etməklə həyata keçirilib.

Böyük Britaniyanın “standard.co.uk” saytı yazır ki, Vladimir Putinin əmri ilə İvan Voroniçi öldürmək üçün Kiyevə qadın və kişidən ibarət 2 nəfərlik qrup göndərilib. Onlar İvan Voroniçi bir neçə güllə vurublar. O, aldığı yaralardan hadisə yerindəcə keçinib.

O da maraqlıdır ki, qətilərdən biri 34 yaşlı Nərmin Quliyevadır. O, əri Xaqani Gülalizadə ilə birlikdə qətldə iştirak edib. Onlar azərbaycanlıdır.

Britaniya nəşri bildirir ki, İvan Voroniç Rusiyada həyata keçirilmiş məşhur dron hücumunun planını cızanlardan biridir. Həmin hücum zamanı Rusiyaya 7 milyard dollarlıq ziyan dəymişdi.

Sayt bildirir ki, mərhum Voroniç Ukrayna Xüsusi Əməliyyat Mərkəzinin 16-cı İdarəsinin 1-ci bölməsinin böyük əməliyyatçısı idi.

Xatırladaq ki, Ukrayna Təhlükəsizlik Xidməti qatillərin zərərsizləşdirildiyini bildirib.