“Krokus Siti Holl” konsert zalında törədilən terror aktı ilə bağlı istintaq materiallarında yeni detallar ortaya çıxıb.

Axar.az xəbər verir ki, bununla bağlı TASS məlumat yayıb.

Agentliyin məlumatına görə, terrorçular hadisə zamanı istifadə etdikləri silahları Dağıstandan gətiriblər.

İstintaq materiallarında bildirilir ki, cinayətkarlar əvvəlcədən planlaşdırılmış şəkildə "Mitsubişi" markalı avtomobildə xüsusi gizli saxlanc yeri düzəldərək, oraya odlu silah və güllələr yerləşdiriblər. Avtomobili idarə edən Şahramcan Qadoyev silahlarla birlikdə Moskvaya yollanıb. Daha sonra Şəmsiddin Fəriduni və Dalercan Mirzəyev Moskvaətrafı meşə massivində silahların təhvil alınması üçün yer təyin ediblər.

2024-cü il martın 21-də terror aktının icraçılarından biri Şəmsiddin Fəriduni Dmitrov şosesində yerləşən həmin əraziyə gələrək Qadoyevdən 3 “Kalaşnikov” avtomatı, 1 “Makarov” tapançası və 1381 ədəd güllə alıb. Silahlar “Renault” markalı avtomobilə yüklənərək, Krasnoqorskun Putilkovo kəndindəki kirayə mənzilə aparılıb və terror aktı zamanı istifadə olunub.

Qeyd edək ki, “Krokus Siti Holl”da törədilən terror aktı nəticəsində 149 nəfər həyatını itirib. Hücumdan sonra hadisənin dörd icraçısı – Məhəmmədsabir Fayzov, Dalercan Mirzəyev, Səidəkrəmi Rəcəbəlizadə və Şəmsiddin Fəriduni Ukraynaya qaçmağa çalışıblar. Onlar Bryansk vilayətində saxlanılaraq Moskvaya gətiriliblər.