“Angara” aviaşirkətinə məxsus An-24 təyyarəsinin yerə çırpılmasından əvvəl sistemlərində hər hansı nasazlıq qeydə alınmayıb.

Axar.az xəbər verir ki, bu barədə Hökumətlərarası Aviasiya Komitəsi məlumat yayıb.

“İlkin məlumata əsasən, təyyarə yerə çırpılana qədər onun sistemlərində nasazlıq müşahidə olunmayıb”, – deyə məlumatda qeyd olunub.

Qeyd edək ki, iyulun 24-də “Angara” aviaşirkətinə məxsus An-24 sərnişin təyyarəsi Amur vilayətinin Tında şəhərində hava limanına eniş zamanı qəzaya uğrayıb. Təyyarədə 6 nəfər ekipaj üzvü daxil olmaqla 49 nəfər olub, onların hamısı həlak olub. Qalıqlar Tındadan 16 km məsafədəki dağ yamacında aşkarlanıb, fraqmentlər 1 hektarlıq əraziyə səpələnib. Hadisə ilə əlaqədar Amur vilayətində fövqəladə vəziyyət rejimi elan olunub və üçgünlük matəm müəyyən edilib. Faktla bağlı cinayət işi başlanıb.