"Azərbaycan rəssamı" dedikdə ağla ilk gələn adlardan biri, bəlkə də birincisi Səttar Bəhlulzadədir. Bu gün rəssamlıq sənətimizin nəhəng siması Səttar Bəhlulzadənin anım günüdür.

O, 1909-cu il dekabrın 5-də Bakının Əmircan kəndində anadan olub. Azərbaycan rəssamlıq məktəbini və Moskva Rəssamlıq İnstitutunu bitirən Bəhlulzadə yaradıcılığında daha çox vətənpərvərlik mövzularının yer aldığı mənzərə-peyzajlar, intim-lirik natürmortlar işləməyə üstünlük verib. Azərbaycan təsviri incəsənətində lirik mənzərə janrının banisi hesab olunan Səttar Bəhlulzadənin "Vətənimin baharı", "Azərbaycan nağılı", "Neft daşları", "Xəzər üzərində axşam", "Xəzər gözəli", "Suraxanı atəşgahı", "Əmircan", "Bakıda atəşfəşanlıq", Kəpəzin göz yaşları", "Naxçıvan. Axşamçağı Ordubad bağlarında", "Şamaxı üzümlükləri", "Qudyalçay vadisi", "Şahnabat", "Əbədi məşəllər", "Əfsanəvi torpaq", "Qızılbənövşəyə gedən yol" və s. əsərləri R.Mustafayev adına Azərbaycan Dövlət İncəsənət Muzeyində və Azərbaycan Dövlət Şəkil Qalereyasında, eləcə də Moskva və s. şəhərlərin muzeylərində saxlanılır.

Bəhlulzadə Moskvadan qayıtdıqdan sonra yaradıcılığında müəyyən dəyişikliklər olur. Rəssam daha çox tarixi mövzulara üstünlük verməyə başlayır və bu dövrdə "Babək üsyanı", "Fətəli xan", "Xəttat Mir Əli" kimi tarixi əsərlər meydana çıxır.

Səttar Bəhlulzadənin fərdi sərgiləri Kanada, Fransa, Norveç, Yaponiya, Belçika, Kuba, Bolqarıstan, Misir, Əlcəzair, Livan, Suriya, İraq, Tunis, Çexoslovakiya və dünyanın bir sıra başqa ölkələrində nümayiş etdirilib, muzeylərdə daimi eksponat kimi saxlanılıb.

Səttar Bəhlulzadə dərin düşüncə adamı idi. Bir dəfə emalatxanasında bir gənc dahi rəssamdan soruşur:

– Səttar müəllim, neçənci ildə və harada anadan olmusunuz?

– Mən iki dəfə doğulmuşam. Bir dəfə əlim fırça tutan, ağlım rəngləri seçən, gözüm gözəlliyi görə bilən gün, bir dəfə də 1909-cu il dekabrın 15-də Bakının Əmircan kəndində.

Azərbaycanın əməkdar incəsənət xadimi, Azərbaycan xalq rəssamı, Azərbaycan SSR Dövlət mükafatı laureatı Səttar Bəhlulzadə 1974-cü ilin bu günü Moskvada vəfat edib və doğma kəndi Əmircanda dəfn edilib. Rəssamın qəbirüstü abidəsi ucaldılıb.